Lalaking ‘exhibitionist’ sa loob ng jeepney tukoy na ng pulisya (Sa Bulacan)

PINAGHAHANAP na ng pulisya ang isang lalaki sa nag-viral na video sa Facebook na nilalaro ang ari habang nasa loob ng pamapasaherong jeepney sa Bulacan.

Kuha ang video noong 20 Marso na isang lalaki ang nilalaro ang kaniyang ari kaharap ang isang babaeng pasahero sa loob ng jeepney.

Ayon sa biktima, naka­sakay niya ang lalaki sa jeep na biyaheng Pulilan sa Bulacan at nang tatlo na lamang silang pasa­hero kasama ang isa pang babae ay tingin nang tingin ito sa kanilang dalawa na tila may kinakamot.

Dito na bumulaga sa biktima ang ginagawang paglalaro ng lalaki sa ari nito na nakuhaan niya ng mga larawan at video.

Bago bumaba ang lalaki ay ginamitan siya ng pepper spray ng biktima na pati tuloy ang isang pasa­herong babae ay natilam­sikan.

Agad na ipina-blotter ng babae sa Barangay Longos sa naturang bayan ang pangyayari at ibinigay ang kopya ng video at larawang kanyang naku­haan.

Napag-alamang may isa pang nabiktima ang lalaki bandang 6:00 – 7:00 am sa kaparehong araw.

Sa update ng biktima sa kanyang Facebook, kinilala ang lalaking exhibitionist at nakatira sa Baliuag, Bulacan.

Kaugnay nito, hini­mok ni P/Capt. Reginal Turla, deputy chief ng Pulilan Police ang mga biktima na magsam­pa ng kaso laban sa lalaki.

Hinikayat din ni Turla ang lalaking naglaro ng ari na kusang sumuko dahil tiyak na hahanapin siya ng pulisya.

(MICKA BAUTISTA)