HATAW! D'yaryo ng Bayan hatawtabloid.com
BINABATI ng Pamahalaang Panlungsod ng Caloocan at ng Caloocan Cultural and Tourism Foundation, Inc. (CCTF) ang mga nagwagi sa nakaraang Ms. Caloocan 2019 na ginanap sa Caloocan Sports Complex.
Kinoronahan bilang Miss Caloocan 2019 si Shanon Tampon ng Barangay 179, habang First Runner-Up si Czarina Sucgang ng Barangay 178. Iniuwi ni Nikki Mae Binuya Guese ng Barangay 63 ang titulo bilang second runner-up. Itinanghal na Ms. Caloocan 3rd and 4th Runner-Up sina Shenna Mae Zaldivar at Kurt Daniel Orilleneda Mataban.
“Binabati ko ang mga nanalo sa Miss Caloocan at lahat ng magagandang binibini na sumali sa patimpalak na ito,” ani Caloocan Mayor Oca Malapitan.
Pinapurihan din ni Mayor Oca ang ipinakitang pagsisikap, dedikasyon, at “sportsmanship” ng mga kandidata.
Ipinahayag ni CCTF Chairwoman Kat Mendoza ang kanilang buong suporta sa bagong Miss Caloocan habang isinasagawa ang kanyang tungkulin bilang bagong kinatawan ng Caloocan sa larangan ng turismo.
Samantala, aminado ang aktor at chairman ng mga board of judges na si Marco Alcaraz na nahirapan sila sa pagdedesisyon kung sino ang mga magwawagi dahil napakaganda lahat ng mga kandidata.
Gayonman sinabi ni Marco na hangad niya ang matagumpay na taon para sa mga bagong reyna ng Caloocan dahil nararapat lamang ang kanilang pagkapanalo.
Positibo rin ang feedback ni Jonathan Chong na isa sa mga judges at kilala bilang mentor ni Ms. Universe Catriona Gray sa mga nag-uwi ng korona na aniya’y “Beauty and brains!”
Nagpasalamat si Miss Caloocan 2019 Shanon Tampon sa Pamahalaang Panlungsod ng Caloocan, CCTF, Barangay 179 chairman Eugenio Notario Jr., at sa Sacred Heart Home Owner’s Association para sa kanilang walang sawang suporta sa kanya para makamit ang korona.
“Iniaalay ko ang korona para sa lahat ng nagtiwala sa sumuporta sa akin lalo sa mga lokal na opisyal ng Barangay 179, ang aking tahanan. Karangalan ko na maging kinatawan ninyo at umaasa ako na magiging katulong ng lokal na pamahalaan ng Caloocan para sa lalo pang pagpapakilala sa ating mahal na Lungsod ng Caloocan,” ani Miss Caloocan 2019 Shanon Tampon. (JUN DAVID)
