HATAW! D'yaryo ng Bayan hatawtabloid.com
SWAK sa kulungan ang isang dishwasher matapos bugbugin ang ka-barangay makaraan siyang tapunan ng tubig sa Malabon City, kamakalawa gabi.
Nilapatan ng lunas sa Tondo Medical Center (TMC) ang biktimang si Ian Angeles, 22-anyos, na pinauwi rin matapos magamot ang sugat sa mukha.
Arestado ang suspek na si Romer Cruz, 19-anyos, ng Langaray St., Brgy. Longos, nahaharap sa kaukulang kaso.
Batay sa ulat nina SPO2 Joselito Bagting at PO2 Philip Cesar Apostol, dakong 9:20 pm, nakatayo ang biktima sa harap ng kainan sa loob ng Langaray Market, Brgy. Longos nang tapunan ng suspek ng pinaghugasang tubig.
Agad gumanti ang biktima at sinabuyan ng tubig ang suspek na nagalit saka pinagsasapak sa mukha si Angeles.
Isinugod ng kanyang pinsan ang biktima sa pagamutan upang magamot ang pinsala sa mukha habang naaresto ng nagrespondeng mga barangay tanod ang suspek.
(ROMMEL SALES)
