Pusakal na snatcher sa Bulacan timbog

NAGWAKAS ang malili­gayang araw ng isang pusakal na snatcher nang matiklo ng mga awtori­dad matapos biktimahin ang isang babae sa Sapang Palay, San Jose del Monte City, Bulacan.

Sa ulat mula kay S/Supt. Chito Bersaluna, Bulacan Police Director, ang suspek ay kinilalang si Carlo Bautista, 20-anyos, residente sa Brgy. San Pedro.

Huling naging bikti­ma ng suspek bago natiklo ay si princess frivaldo, na residente rin sa nabanggit na barangay.

Sinasabi sa ulat, dakong 9:30 kamakalawa ng gabi, naglalakad ang biktima sa nabanggit na barangay nang biglang sumulpot ang suspek mula sa madilim na bahagi ng lugar.

Pilit na inagaw ng suspek ang bag ng biktima na bandang huli ay nakuha rin niya sabay karipas ng takbo.

Lingid sa kaalaman ng suspek, nalaglag sa bag ang cellphone OPPO A35 ng biktima na agad niyang ipinangtawag sa mga barangay officials at humingi ng saklolo.

Bago nakalayo ay nasakote ng mga nagres­pondeng barangay tanod ang suspek na agad na­mang dinala sa himpilan ng pulisya para sa kau­kulang disposisyon.

Ayon sa mga awto­ridad, isang pusakal na snatcher si Bautista na gumagala pa sa ilang bahagi ng lalawigan para mag-operate.

(MICKA BAUTISTA)