4 bata, 2 nanay patay (2 sugatan) sa sunog sa Parañaque

ANIM katao ang namatay na kinabibi-langan ng apat na bata, at dalawang nanay, nang hindi makalabas sa nasunog na lumang residential building sa Brgy.Tambo, Parañaque City, nitong Miyerkoles ng gabi.

Magkakasamang na­tagpuan sa ground floor ang bangkay ng tatlong biktimang sina Marie Joy De Jesus, 28, at mga anak niyang sina Jomarie Canaria, 6, at Daniel Luis Canaria, 10-anyos.

Gayondin ang pamangkin ni De Jesus na si Ana Dona Agrasada, 23, at mga anak na sina Jake Amata, 6, at Jake Angelo Amata, 3, pa­wang residente sa Quirino Ave., Brgy. Tambo ng lungsod.

Dalawa ang nasuga­tan na hindi na pina­ngalanan.

Ayon kay Parañaque Fire Marshal Supt. Robert Pasis, sa inisyal na imbestigasyon, nagsimu­la ang sunog pasado 6:00 pm sa 53-anyos Bahay na Bato na may tatlong pa­lapag sa Quirino Avenue.

Nagsimula ang sunog sa unit na tinitirhan ng pamilya Agrasada na sinabing naglalaro ng pos­poro ang dalawang bata.

Sa tindi ng lakas ng apoy ay bumagsak ang ikalawang palapag ng gusali kasama ang anim na biktima, na pinanini­walaang hindi nakalabas dahil sa makipot na daan.

Ayon kay Supt. Pasis, nahirapan silang apulain ang apoy dahil makipot ang daan at napaliligiran ng mga barong- barong ang gusali.

Natagpuan ng mga bombero ang bangkay ng mga biktima dakong 10:00 pm makaraan ideklarang fire-out ang sunog na umabot sa ikatlong alarma.

Ayon kay Marlon Agrasada, 30, nasa trabaho siya nang maba­litaan niyang nasusunog ang kanilang bahay.

Sa impormasyong nakuha ng arson inves­tigators, 1965 pa itinayo ang gusali at  dapat ay wala nang nakatirang mga residente ngunit tinirahan ng informal settlers na nagtayo ng mga barong-barong.

Sa kabuuan, 400 katao na naninirahan sa gusali ang naapektohan ng sunog.

Napag-alaman, ikat­long beses nang na­sunog ang gusali sa nakalipas na sampung taon.

Pansamantalang dina­la sa covered court at sa barangay hall ang mga residenteng naapektohan ng sunog na inaasahang tutulungan ng pama­halaang lokal ng Para­ñaque.