Negosyante itinuro sa P6.4-B shabu shipment mula China

ITINURO ng isang testigong sinasabing broker ng shipment ng P6.4 bilyon halaga ng shabu, sa negosyanteng si Richard Tan ang nasabing kontrabando.

Sinabi ni Mark Taguba sa Senate Blue Ribbon Committee, si Tan ang negosyanteng may-ari ng Hongfei, kompanyang nagko-consolidate ng shipments mula sa China, ay may warehouse sa Valenzuela City.

Iginuhit ang diagram sa whiteboard, ipinaliwanag ni Taguba na si Tan, sa pamamagitan ng kanyang kompanya, ay nagko-consolidate ng iba’t ibang produkto na ipadadala sa Filipinas.

Ang consolidated goods na ito mula sa iba’t ibang may-ari ay maaaring kinabibilangan ng cylinders na may lamang illegal drugs, ayon kay Taguba.

Sinabi ng testigo, ipinasa ni Tan ang package list sa middleman na kinilalang si Kenneth Dong, na siyang naghahanap ng broker na magha-hire ng Manila-based consignee para sa shipment.

Aniya, siya at kapwa consignee na si Eirene Tatad, ay hindi batid na may kontrabado sa loob ng shipment. Aniya, maaaring batid ni Tan kung sino ang may-ari ng cylinders at kung sino ang “recipients” nito.

“Dahil iba-iba po ang may-ari, iba-iba rin po ang pagdedeliberan nito. Siya rin po ang nakakikilala kung sino ang nagparating ng cylinders, si Richard Tan po. Siya rin po ang nakakikilala kung sino ang tatanggap,” aniya.

Sinabi rin niyang hindi niya kilala nang personal si Tan dahil ang kanyang kliyente ay si Dong. “Ang point ko lang po dito, meron talagang nag-process ng drugs na ‘yun,” aniya.

Ipinunto ni Taguba, hinahanap niya ang CCTV footage ng kanyang mga tauhan na nagdiskarga ng shipment sa warehouse ngunit sinabing sira ang mga camera, kaya nagduda siya.

Kaugnay nito, hiniling ni Senador Richard Gordon sa National Bureau of Investigation na mag-isyu ng hold departure order laban kay Tan.

Nais din ipatawag ni Gordon sina Tan at Dong para magpaliwanag sa Senado kaugnay sa inihayag ni Taguba.