HATAW! D'yaryo ng Bayan hatawtabloid.com
MATAPOS pagharian ang NCAA Juniors Season 92 noong nakaraang taon, sinunod kobrahin ng Mapua-Malayan Red Robins ang Filoil Flying V Pre-season Premier Cup kahapon sa San Juan.
Naiiwan sa 62-59 papasok ng huling kanto, nagpakawala ang Red Robins ng 30-20 panapos na bomba para pabagsakin ang Ateneo Blue Eaglets, 89-82 sa high school Finals ng premyadong pre-season tournament ng bansa.
Kumayod ng halimaw na 17 puntos, 14 rebounds, 2 assists at 2 blocks si Will Gozum habang nag-ambag ng 23 at 18 puntos ang mga kasanggang sina Clint Escamis at Warren Bonifacio, ayon sa pagkakasu-nod para sa Red Robins na pinatatag ang tangan sa titulong pinakamagaling na high school team ngayon sa bansa.
Nagpakawala ng 20 assists ang Mapua kontra sa 18 ng Ateneo at pumupog sa rebounding, 64-54.
Nanguna sa Blue Eaglets si Dave Ildefonso sa kanyang 16 puntos habang solido ang 15 puntos at 14 rebounds na kontribusyon ni Kai Sotto.
Nagmando naman sa 9 puntos, 4 rebounds at 6 assists si SJ Belangel para sa Ateneo lamang sa halos kabuuan ng laro bago maunahan ng Mapua sa dulo.
Samantala, nagkasya sa tansong medalya na pagtatapos ang NU Bullpups nang lapain ang UST Tiger Cubs, 86-75 sa Battle or Third.
ni John Bryan Ulanday
