Female personality, deadma sa pasikot-sikot sa casino

LIHIM na pinagtatawanan ang female personality na ito ng mga taong kilala siya bilang laman ng mga casino.

Ito ang emote ng isa sa kanila, “Nag-o-on cam siya sa TV pero wala siyang kaingat-ingat na nakikita sa mga casino. Okey lang sana kung artista siya, pero nasa ibang larangan siya. Paano na lang ang credibility niya?”

Pero depensa ng nasabing on cam personality, matagal na niyang “isinumpa” ang pagsusugal. “Ano ‘kami? Pakiulit?! ‘Yun ba ang hindi na nagsusugal, eh, kailan lang naispatan siya sa isang mala-salon na area ng casino at tahimik na pindot nang pindot sa slot machine?!”

Eto ang nakatatawa. Kamakailan ay sumalang ang personalidad na ‘yon sa camera, iniinterbyu niya ang isang resource person hinggil sa trahedyang naganap sa isang casino.

“Imagine, ang lakas ng loob ni (pangalan niya) na tanungin kung anong floor daw ba ang casino, saan matatagpuan ang exit at kung ano-ano pang floor plan ng gusali? Juice kong mahabagin, siyang tambay ng casinong ‘yon, hindi pamilyar sa mga pasikot-sikot doon? Echosera siya!”

Da who ang on cam TV personality na ito na dating nakarelasyon ng isang sikat na TV host? Itago na lang natin siya sa alyas na Bluer Casimiro.

(Ronnie Carrasco III)