HATAW! D'yaryo ng Bayan hatawtabloid.com
TATANGKAING dumalawang sunod ng Cavaliers at makahirit pa ng Game 6 samantala hahangaring tapusin ng Warriors ang serye sa muli nilang sagupaan ngayon sa Game 5 ng 2016-2017 NBA Finals sa Oracle Arena sa Golden State.
Nakahinga noong Game 4 dahil sa 137-116 panalo para maputol ang pagkakaiwan sa 3-1, sasandal muli ang Cleveland sa Big 3 nitong sina LeBron James, Kyrie Irving at Kevin Love.
Balak duplikahin ni LeBron James ang 29 puntos, 10 rebounds at 11 assists na triple double gayondin ang 40 puntos ni Kyrie Irving para maitulak ulit ang laro sa Game 6 na babalik sa Cleveland kung sakali.
Pumukol ng 24 tres ang Cavs sa Game 4, 49 puntos sa 1st quarter at 86 puntos sa 1st half, rekord sa all-time Finals history at kakailanganing magawa ulit iyon upang manalo sa Oracle na hindi pa natatalo ang home-team na Golden State sa playoffs.
Samantala, nadiskaril ang malinis na 16-0 baraha sana ng Warriors tungo sa kampeonato, susubukan naman nilang tapusin ito at hindi na paabutin pa ng Game 6 sa likod ng kanilang lider na si Kevin Durant sa kanyang 35 puntos sa Game 4.
Babawi ang Splash Brothers na sina Klay Thompson at Stephen Curry na nagkasya lamang sa 16 at 14 puntos, ayon sa pagkakasunod.
Kapwa hangad ng dalawang koponan ang ikalawang kampeonato sa kanilang ikatlong paghaharap sa loob ng 3 magkakasunod na taon.
ni John Bryan Ulanday
