HATAW! D'yaryo ng Bayan hatawtabloid.com
DUMALAWANG sunod na dikit na panalo ang Team Batangas habang tinagay ng Tanduay ang kanilang unang panalo sa 2017 PBA D-League Foundation Cup kahapon sa Ynares Center sa Pasig City.
Isinalpak ni Cedric De Joya ang fastbreak lay-up mula sa mintis ni Robbie Herndon ng Wangs upang maitakas ng Batangas ang 91-89 tagumpay at kanilang ikalawang sunod na panalo sa Foundation Cup.
Kumana ng 14 puntos at 3 assists si De Joya habang nagliyab sa 25 puntos ang kanyang kasanggang si Joseph Sedurifa para sa Batangas na sumosyo sa liderato kasama ang Flying V Thunder sa 2-0 kartada.
Nauwi sa wala ang 27 puntos at 14 rebounds ni Herndon para sa Basketball Couriers na bahagyang lumagpak sa 1-1.
Samantala, tinagay ng Tanduay ang kanilang unang panalo sa liga sa pamamagitan ng paglasing sa CEU Scorpions, 75-60.
Nanguna para sa Rhum Masters ang dating manlalaro sa PBA na si Lester Alvarez sa kanyang 16 puntos habang nagdagdag ng 8 puntos at 11 rebounds si JayR Taganas.
Bagamat may 20 puntos, 14 rebounds at 2 supalpal si Rod Ebondo ay hindi pa rin sapat upang hindi mahulog sa 0-2 ang baraha ang Scorpions. (JBU)
