Tulong-tulong sa seguridad sa ASEAN

MAGSISIMULA ngayon ang dalawang araw na pagtitipon ng mga lider ng Association of South East Asian Nations (ASEAN) para pag-usapan at solusyonan ang mga isyung political at pang-ekonomiya ng rehiyon.

At habang abala ang iba’t ibang pamahalaan kung anong concerns ang ihahain nila sa summit, hindi na rin matatawaran ang ginagawang paghahanda ng administrasyon ni Pangulong Rodrigo “Digong” Duterte, partikular ang Philippine National Police, para matiyak ang mahigpit na pagpapatupad ng seguridad at kaligtasan ng mga lider na dadalo kasama ang kani-kanilang mga delegasyon.

Mahalagang maging matagumpay ang 30th ASEAN summit para sa kapakinabangan sa bawat miyembrong bansa na kasapi nito. Pero kaakibat lagi ng pagtitipong ito ang threat ng terorismo at destablisasyon laban sa administrasyong Duterte.

Ang sinasabing layunin ng banta ng terorismo at destabilisasyon ay para hiyain sa international community si Duterte at ang bansa na siya ngayong host o chairman ng 2017 ASEAN summit.

Kaya nga nakapagdududa ang timing ng kasong isinampa laban kay Duterte sa International Criminal Court, ang sunod-sunod na banta ng terorismo sa Bohol at sa Mindanao na ang tunay na layunin ay maipahiya siya.

Kung inaakala nilang magtatagumpay sila sa kanilang layunin na di magtagumpay si Duterte ay nagkakamali sila. Ang ginagawang paghahanda ng PNP, kasama na rin ang Armed Forces at iba pang mga ahensiya ng pamahalaan at higit sa lahat ang pakikipagtulungan ng taongbayan ang magiging daan para maging matagumpay ang summit.