Sonsona brothers magpapakitang-gilas

SUMUMPA ang magkapatid na Eden at Lolito Sonsona ng General Santos City na pareho nilang duduplikahin  ang naging tagumpay ng pinsan nilang si dating WBO world super flyweight champion Marvin “Marvelous” Sonsona sa magiging laban nila sa February 26 sa Lagao Gym.

Si Eden na  dating WBC international Silver super featherweight champion ay haharapin si Jovany Rota para sa bakanteng WBF  international super featherweight crown.

Samantalang si Lolito ay mahaharap naman kay dating Philippine light flyweight champion Renren Tesorio ng Palawan para sa bakanteng  WBF Asia Pacific super flyweight title.

Samantala, ito ang ikalawang comeback fight ni Eden pagkaraan ng 18 buwang pamamahinga pagkatapos na masungkit niya ang WBC international Silver Super featherweight title sa pamamagitan ng 2ndround technical knockout laban kay Mexican Adrian Estrella sa Mexico noong May 16, 2015.

Ang laban ng magkapatid na Sonsona ay bahagi ng bakbakang pinamagatang “Laban Pinoy 3: Rise of Champions”  ng Sanman Promotions at Solar Sports.

(ARABELA PRINCESS DAWA)