Nag-iwan ng bomba sa US Embassy arestado na

NAARESTO na sa Bulacan kahapon ng umaga ang suspek na nag-iwan ng bomba sa Baywalk malapit sa US Embassy nitong Lunes.

Nadakip ang suspek na si Rayson Kilala alyas Rashid, 34, residente ng Brgy. Bagumbayan, Bulakan, Bulacan.

Ayon kay Sr. Supt. Romeo Caramat, Bulacan police provincial director, nadakip si Kilala dakong 9:30 am ng mga tauhan ng Manila Police District (MPD) at Bulacan Police. Makaraang maaresto, dinala sa MPD ang nasabing suspek.

Kamakalawa, inilabas ni PNP chief, Director General Ronald Dela Rosa ang cartographic sketch ng suspek.

Sakay ng taxi, sinasabing itinapon ng suspek ang IED na may 81MM mortar sa isang basurahan sa Baywalk at natuklasan ng isang street sweeper dahilan para mai-detonate ito ng bomb squad.

(MICKA BAUTISTA)