HATAW! D'yaryo ng Bayan hatawtabloid.com
PATAY agad ang dalawang batang magkapatid, habang binawian ng buhay ang ina sa ospital at apat ang sugatan sa pagsabog ng pabrika ng paputok nitong Miyerkoles ng umaga sa lalawigan ng Bulacan.
Kinilala ang magkapatid na sina Ashley Mayo, 2-anyos, at Rylee Mayo, 5-anyos, ayon sa ulat ni Bulacan Fire Senior Insp. Carlos Estipular.
Namatay sa Rogaciano Mercado Memorial Hospital ang ina ng dalawang bata na si Grace Mayo, na naputulan ng dalawang paa.
Napag-alaman, naganap ang pagsabog sa pagawaan ng AA Fireworks na pag-aari ni Totsie Alonzo sa Sitio Bangka-bangka, Brgy. Pulong Buhangin sa Sta. Maria dakong 9:00 am.
Ayon sa Bulacan Police, paso na noon pang Hunyo 14, 2016 ang lisensiya ng sumabog na pabrika.
Unang iniulat na kabilang sa limang sugatan ang ina ng dalawang namatay na si Grace, naputulan ng paa, pero binawian ng buhay sa ospital.
Ang mag-iina ay maghahatid ng pagkain sa kanilang padre de familia na nagtatrabaho sa pabrika.
Ang malakas na pagsabog ay naramdaman hanggang sa mga kanugnog ng Brgy. Pulong Buhangin kaya’t nagpulasan ng takbo sa takot ang karamihan sa mga residente.
ni MICKA BAUTISTA
