HATAW! D'yaryo ng Bayan hatawtabloid.com
NAGTATAKA ang program manager ng seryeng FPJ’s Ang Probinsyano na si Ms. Dagang Vilbar kung saan nagmula ang balitang Batang Quiapo ang ipapalit sa serye ni Coco Martin sa 2017.
Ang Batang Quiapo ay pelikula nina Fernando Poe Jr. at Maricel Soriano na ipinalabas noong 1986 mula sa direksiyon ni Pablo Santiago at malaking hit ito sa takilya.
Sabi ni Ms. Dagang nang makita naming kumakain sa Grub Restaurant, “baka naman kasi nakita nilang iyon ang ipinakitang teaser sa Ang Probinsyano Pasasalamat concert (Oktubre 8) kaya akala nila ‘yun na.
“Hindi totoo ‘yun kasi maigsi lang ‘yung ‘Batang Quiapo’, hindi puwedeng gawing series ‘yun, dahil kung ganoon din lang, eh, anong pagkakaiba sa ‘Ang Probinsyano’? Halos same lang naman ang concept ng ‘Batang Quiapo’ at ng ‘Ang Probinsyano’?
“Hindi pa nga kami nakabubuo ng ipapalit kasi hindi pa rin namin alam kung kailan matatapos ‘Ang Probinsyano’.”
Naulat ding sina Julia Montes at Liza Soberano ang makakapareha ni Coco sa Batang Quiapo.
Hindi pinansin ni Ms. Dagang ang tungkol sa posibleng leading ladies ng aktor dahil mas binigyan niya ng diin ang balitang Batang Quiapo ang ipapalit sa FPJ’s Ang Probinsyano na malayo raw sa katotohanan.
Sa ganang amin din ay oo nga, pareho ng concept ang Ang Probinsyano at Batang Quiapo.
Dagdag pa ni Ms. Dagang, “nakatatawa ‘yang balitang ‘yan, mas marunong pa sila sa amin? Sila-sila lang ang nag-meeting, hindi kami isinama?”
FACT SHEET – Reggee Bonoan
