KZ no time for love, mga kapatid pinag-aaral pa

KATULAD ni Yeng Constantino ay sumusulat din ng kanta si KZ Tandingan, pero wala pa raw siyang lakas ng loob na sumulat para sa co-singers niya tulad ng Pop Rock Superstar.

Sa nakaraang Divas Live in Manila presscon ay nabanggit ni Yeng na nakagawa na siya ng kanta para kina Angeline Quinto at KZ bukod pa sa ibang artists tulad nina Erik Santos, Vice Ganda at iba pa. Bukod tanging si Kyla lang ang hindi pa nagagawan ng una.

Kaya tinanong namin si KZ tungkol dito, ”actually po, sumusulat ako ng kanta para sa akin palang, pero gusto ko rin naman po sumulat din para sa mga kasama ko, as of now wala pa,” say ng rakista ng Cornerstone diva.

Napakinggan namin ang jazz version ni KZ ng Isang Linggong Pag-Ibig at gandang-ganda kami.

“Kami-kami lang po ng ka-banda ko ang nag-arrange niyon, salamat po ang nagustuhan n’yo,” nakangiting sabi ng dalaga.

For the nth time ay muling natanong si KZ kung kailan naman siya mag-aasawa tulad ni Yeng dahil nasa tamang edad na rin naman ang X Factor Philippines 2012.

“Wala pa po kasi kailangan mapagtapos ko muna ng pag-aaral ang mga kapatid ko,” mabilis nitong sabi.

Sabagay, tulad ni Angeline habang may offer tanggap lang ng tanggap.

At in fairness, maraming raket si KZ sa corporate shows bukod pa sa mga concert.

FACT SHEET – Reggee Bonoan