BAGSAK sa kulungan ang isang construction worker makaraan ireklamo ng pangmomolestiya ng isang 10-anyos batang babae kamakalawa ng gabi sa Malabon City.
Kinilala ni Insp. Rosalitty Avila, hepe ng Womens and Children’s Protection Desk ng Malabon City Police, ang suspek na si Melo Araña, 27, ng 138 Narra St., Bagong Barrio, Caloocan City, nakapiit na sa detetntion cell ng Malabon City Police.
Base sa pahayag sa pulisya ng biktimang itinago sa pangalang Rens, Grade 5 pupil, dakong 6 a.m. naglalakad siya sa Bagong Lote St., Brgy. Potrero patungo sa kanilang eskwelahan nang makasalubong niya ang suspek.
Nagulat ang biktima nang biglang hinawakan ng suspek ang kanyang bag at dinakma ang kanyang pagkababae.
Sa takot ng bata ay napatakbo siya at mabilis na nagsumbong sa kanyang guro.
Sinamahan ng kanyang guro ang biktima sa himpilan ng pulisya upang humingi ng tulong at sa isinagawang follow-up operation ng mga pulis, nasakote ang suspek na nahaharap ngayon sa kasong acts of lasciviousness in relation to RA 7610 (Child Abuse) sa piskalya ng Malabon City.
( ROMMEL SALES )
