Ina ni Padaca nabagok, patay

CAUAYAN CITY, Isabela – Nagluluksa ang pamilya ni dating Comelec Commissioner at dating Isabela Governor Grace Padaca dahil sa pagpanaw ng kanilang ina na isang retiradong guro.

Si Amelia Padaca ay sumakabilang buhay sa edad 81-anyos.

Sinabi ni Carlos Bernardo Padaca, accountant at panganay na anak, malakas pa ang kanilang ina at hindi nila inaasahan ang biglang pagpanaw.

Sinabi ni Padaca, nabagok ang ulo ng kanilang ina nang madulas sa sahig ng kusina ng kanilang bahay.

Nagkaroon ng sugat sa ulo ang ina kaya isinugod sa isang pribadong pagamutan ngunit na-comatose nang ilang araw bago pumanaw dakong 3:00 pm kamakalawa.

Nabatid na nagturo nang ilang dekada sa Cauayan South Central School si Amelia Padaca.

Ang kanyang labi ay nakaburol sa Carbonel Funeral Homes sa Cauayan City.