5 sugatan sa natumbang kotse sa Benguet

BAGUIO CITY – Isinugod sa pagamutan ang lima- kataong nasugatan makaraan matumba ang sinasakyan nilang kotse na may plakang XFG 458, sa Km. 12, Guyad, Tadiangan, Tuba, Benguet kahapon ng umaga.

Kinilala ang mga biktimang sina Cyrus Ulalan Secillano, 38, driver ng kotse at residente ng Bakakeng, Baguio City; Marichu Banyaga Secillano; Andrei Agana Namoro; Jean Claire Sagun Bugnay; at Jennielyn Dizon Ellamil.

Ayon sa driver ng kotse, pababa sila sa Asin Hotspring nang mawalan ng preno ang sasakyan kaya’t napilitan siyang ibangga ang kotse sa riprap na nagresulta sa pagkatumba nito.

Agad nagresponde ang Tuba Emergency Medical Services at dinala sa ospital ang mga sugatan.