3 patay sa masaker sa Kidapawan City

NORTH COTABATO – Tatlo ang patay sa nangyaring masaker dakong 10:20 p.m. kamakalawa sa Kidapawan City.

Kinilala ang mga biktimang sina Ruben Bagasin, 21, isang barbero; Wanito Gamboa, 25, at Francisco Sagayan, Jr., 36, pawang tricycle driver at residente sa Maldrid Subdivision, Brgy. Poblacion, Kidapawan City.

Ayon kay Supt. Bernard Tayong, tagapagsalita ng Cotabato Police Provincial Office, nanonood sa telebisyon ang mga biktima sa bahay ni Bagasin nang biglang pasukin ng dalawang hindi nakilalang mga suspek at pinagbabaril gamit ang kalibre .45 pistola.

Agad binawian ng buhay ang mga biktima na tinamaan ng maraming bala sa kanilang katawan.

Mabilis na tumakas ang mga suspek lulan ng isang motorsiklo patungo sa isang liblib na lugar sa lungsod ng Kidapawan.

Malaki ang paniniwala ni Kidapawan chief of police Supt. Leo Ajero, posibleng may kinalaman sa ipinagbabawal na droga ang pagpatay sa mga biktima na patuloy nilang iniimbestigahan.