Dayuhan timbog sa ecstacy

NAARESTO ang dalawang foreign national sa Makati City kasunod ng drug buy-bust operation ng mga tauhan ng Philippine National Police (PNP) Anti-Illegal Drugs Group nitong Lunes ng gabi.

Ayon sa ulat ng pulisya, bumili ang police asset ng 120 tablets ng blue cookie monster esctacy mula sa Canadian na si Jeremy Eaton.

Pagkaraan, bumili rin ang police asset ng karagdagang 50 tablets mula sa Australian na si Damian John Berg.

Narekober mula kina Eaton at Berg ang 170 ecstasy tablets na may street value na P255,000, at P100,000 boodle money.

Ayon sa pulisya, ang dalawang suspek ay konektado sa mga drug pusher na naaresto ng mga tauhan ng National Bureau of Investigation (NBI) kaugnay sa Close-Up Forever Summer Concert incident.

Dagdag ng pulisya, ang dalawang suspek ay bahagi ng malaking sindikato ng mga drug pusher.

“Ino-order ang drugs sa ibang bansa at ipinapadala through courier,” pahayag ni Supt. Enrico Rigor, hepe ng legal and investigation ng PNP Anti-Illegal Drugs Group.

Ang mga suspek ay sasampahan ng paglabag sa Comprehensive Dangerous Drugs Act.