‘Bosero’ sugatan sa boga

SUGATAN ang isang lalaking sinasabing namboso sa Pasay City nitong Linggo makaraan siyang barilin ng live-in partner ng nagrereklamong babae.

Sinasabing ipinatong ng suspek ang isang cellphone sa bintana ng banyo para makuhaan ng video ang naliligong biktimang si alyasJackie Lou.

Napansin ng babae ang cellphone kaya agad siyang nagsumbong sa isang barangay ex-o na siya rin may-ari ng pinauupahang bahay.

Nagduda ang opisyal ng barangay na pagmamay-ari ng isa pa niyang tenant na si Larry Ibañez ang cellphone.

Dahil dito, kinompronta ni “Jackie Lou” si Ibañez at nagkasagutan silang dalawa.

Sa gitna ng pagtatalo, binaril si Ibañez ng kinakasama ni Jackie Lou, na kinilalang si Rein Joseph Rimorin.

Pagkaraan ay mabilis na tumakas ang babae at si Rimorin.

Isinugod sa ospital si Ibañez na nakatakdang operahan dahil sa tama ng bala sa kaliwang bahagi ng tiyan.

Iginiit ng kampo ni Ibañez na walang video nag naliligong babae sa kanyang cellphone.

Jaja Garcia