Melai, tumindi ang galit sa ama ng kanyang anak

MAS magiging komplikado ang buhay pag-ibig ng mga bida na sina Maricel (Melai Cantiveros) at Wilma (Pokwang) ngayong mas umiigting ang galit ng una sa ama ng kanyang anak at hindi pa rin aprubado ang huli sa pamilya ng kanyang nobyo sa  Kapamilya  afternoon series na We Will Survive.

Bagamat hindi na binigyan pa ng pag-asa, patuloy pa rin si Pocholo (Carlo Aquino) sa panunuyo kay Maricel upang muling mapaibig ito.  Ngunit sa kabila nito, hindi pa rin binubuksan ni Maricel ang kanyang puso para kay Pocholo at desididong hindi na ito ibigin pa sa takot na lokohin lamang siyang muli.

Samantala, patuloy pa ring pinatutunayan ni Wilma ang kanyang sarili sa pamilya ni Edwin (Jeric Raval) at ipinakikitang siya ay karapat-dapat para rito. Bagamat nahihirapan, hindi pa rin siya susukong mapukaw ang kanilang mga puso at makuha ang kanilang tiwala.

Matiis pa rin kayang hindi makipag-ayos ni Maricel kay Pocholo kahit naaapektuhan na ang kanilang anak? Ano naman kaya ang dapat gawin ni Wilma upang makuha ang loob ng kayang magiging manugang? Mabuo pa kaya ang pamilyang kanilang inaasam?

( Alex Brosas )