4 sugatan sa bumaliktad na taxi sa Kyusi

APAT ang sugatan makaraan bumaliktad ang isang taxi sa Quezon Avenue southbound sa Quezon City nitong Linggo.

Kuwento ng driver na si Noel Malapit, binabaybay niya ang naturang kalsada dakong 3 a.m. nang biglang tumawid ang isang itim na kotse.

Galing aniya sa kalapit na bar ang kotse at papunta ng U-turn slot.

Bumangga ang taxi sa kotse, sumampa sa road center island at bumaligtad. Natanggal din ang gulong ng taxi sa lakas ng pagbaliktad nito.

Mabilis na nailabas sa taxi si Malapit at tatlo niyang pasahero na pawang nagkaroon ng mga galos at sugat sa katawan.

Kinilala ang driver ng kotse na si Albert Christian Uy.

Inabot ng isa’t kalahating oras bago naialis ang bumaliktad na taxi sa lugar.