Magsasaka, 3 kalabaw patay sa tama ng kidlat

CAUAYAN CITY, Isabela – Patay ang isang magsasaka at kanyang tatlong kalabaw makaraan tamaan ng kidlat kasabay ng malakas na ulan kamakalawa ng gabi.

Ayon kay Sangguniang Bayan member Eddie Mayor ng San Agustin, Isabela, ang namatay ay si Merlin Pascual, 53, residente ng Dabubu Grande, San Agustin.

Hindi nakauwi si Pascual sa kanilang bahay nang magtungo sa bukid dakong 5 p.m. para isuga ang kanyang mga kalabaw.

Pinuntahan siya ng kanyang pamilya sa bukid at natagpuan ang kanyang nakahandusay na katawan kasama ang tatlong alagang kalabaw.

Nasunog ang katawan ni Pascual at tatlong kalabaw kaya naniniwala ang kanyang mga kaanak na tinamaan siya ng kidlat kasabay nang malakas na ulan.

Agad ibinaon sa lupa ang tatlong kalabaw habang nakaburol na sa kanilang bahay ang bangkay ni Pascual.