Goma, wagi bilang mayor ng Ormoc

ILANG oras pa lamang natatapos ang eleksiyon, lumabas na ang balita na naiproklama na ng city canvassers sa Ormoc na nanalong mayor ang actor na si Richard Gomez. Biglang naglabasan sa social media pati na ang official proclamation document, at ang mga picture na itinataas na ng mga kinatawan ng COMELEC ang kamay ng mayor elect.

Pagkatapos niyon, sunod-sunod naman ang labas ng mga objection sa social media. Hindi lamang daw dapat iproklamang mayor ng Ormoc si Goma. Dapat din daw iproklama si Goma bilang pinakapoging mayor sa Pilipinas. Agree po kami riyan.

Wala naman kasing mayor ngayon na masasabi mong mas pogi kaysa kay Goma, mayroon pa ba? Ang malungkot lang, bilang executive ng kanyang bayan, tiyak na mababawasan ang panahon ni Goma sa showbusiness. Sa panahong ito na kulang na kulang pa naman ng leading man sa mga pelikula at telebisyon, malaking kawalan iyang bawas na ang panahon ni Goma.

Kung natatandaan ninyo, leading man sa mga high rating series nitong mga nakaraang araw. Best actor pa siya sa Portugal. Bihirang-bihira iyong makakita ka ng isang artistang guwapo na, magaling pang umarte. Marami riyan pogi pero walang kaalam-alam sa pag-arte. Puro pa-cute lang ang nalalaman kaya hindi naman tumatagal ang career.

Iyon bang basta napanood mo sisigawan mo ng “shut up”.

HATAWAN – Ed de Leon