2 prison guard ng BuCor, 11 pa tiklo sa drug den malapit sa NBP

DALAWANG prison guard ng Bureau of Corrections (BuCor) ang dinakip ng mga ahente ng National Bureau of Investigation (NBI) at 11 iba pa sa pagsalakay sa hinihinalang drug den malapit sa compound ng New Bilibid Prison (NBP) sa Muntinlupa City kamakalawa ng umaga.         

Sina Prison Guard 1 Ferdie Tensua at PG1 Arturo Abellera, nakatalaga sa BuCor, ay dinakip ng NBI, habang hindi binanggit ang pangalan ng 11 iba pang naaresto.

Ayon kay Atty. Joel Tovera ng Anti-Illegal Drug Division ng NBI, sinalakay ang limang kuwarto dakong 6 a.m. malapit sa compound ng NBP.

Sinabi ni Atty. Tovera, protektado ng mga Chinese drug lord na nakakulong pa hanggang ngayon, ang sinasabing drug den na malapit sa compound ng NBP.