HATAW! D'yaryo ng Bayan hatawtabloid.com
PINAGMULAN na naman ng panibagong intriga ang isang social media post ni Sunshine Cruz na sinasabi lang naman niya na naisip niyang mag-aral muli, para madagdagan pa ang kanyang nalalaman at ang naabot ng kanyang formal education. Marahil nakakita naman ng panahon si Sunshine kaya naisip niyang mag-aral ulit.
Pero ipinakita kasi niya ang kanyang school registration at ang nakalagay na pangalan ay Sunshine Montano. Nagtatanong sila bakit?
Hindi pa po naidedeklarang walang bisa ang naging kasal nila noon ni Cesar Montano, kahit na nasa korte na ang petisyon ni Sunshine na ideklarang wala ngang bisa ang kanilang kasal sa simula’t simula. Habang wala ang annulment, ang legal name na kailangang gamitin ni Sunshine sa ayaw man niya at sa gusto ay Sunshine Montano nga. Ang talagang apelyido ni Cesar ay Manhilot, pero noong kumandidato siya ay nag-petition siya sa korte na payagan siyang magpalit na ng pangalan at kilalanin sa apelyidong Montano. Pinayagan iyan ng korte. Kaya legally ang apelyido niya at ng sinumang miyembro ng kanyang pamilya, pati ang mga kinikilala niyang mga anak ay Montano na.
Kung dumating ang panahon na ibigay ng korte kay Sunshine ang kanyang hinihinging annulment, madali lang naman niyang baguhin ang lahat ng mga legal papers at palitan ulit iyon ng Sunshine Cruz dahil iyon naman ang kanyang tunay na pangalan.
HATAWAN – Ed de Leon
