HATAW! D'yaryo ng Bayan hatawtabloid.com
NAKANGITI lang si Sunshine Cruz nang may magbanggit sa kanya tungkol sa podcast interview sa
sikat na Japanese porn star na si Maria Ozawa, na inamin niyon na bago nila ginawa ang isang pelikula para sa nakaraang festival ay may nangyari sa kanilang dalawa ni Cesar Montano. Minsan lang naman daw iyon at hindi na naulit, sabi ni Ozawa nang kulit-kulitin ni Dj Mo sa podcast.
Ang maganda lang, kahit na may lumalabas na mga ganyang balita ngayon, nakangingiti na si Sunshine, hindi kagaya noong araw na halata mong nakukunsumi siya sa mga ganyang balita. Hindi na nga apektado si Sunshine matapos ang matagal na rin naman nilang paghihiwalay, at sinabi nga niya, ”very soon makakukuha na rin naman siguro kami ng annulment ng aming kasal. Sa ngayon iyon na lang ang gusto kong mangyari,” sabi ng aktres.
Kahit na anong kulit mo kay Sunshine, sasabihin niyang wala na talaga sila at wala na rin naman sigurong pag-asang magkabalikan.
“Nirerespeto ko pa rin naman siya bilang ama ng aking mga anak. Hindi ko naman maikakaila iyon. Pero iyong sa akin, personal wala na talaga. Tahimik na ang buhay ko. Mabait naman sa akin ang Diyos na nakakayanan ko ang buhay ng isang single parent. Kahit na paano ay hindi nakokompromiso ang mga kailangan ng mga anak ko, at para sa akin tama na iyon,” sabi pa ni Sunshine.
Pero ano ang sinasabi niya sa kanyang mga anak kung may naririnig na ganyan?
“Wala na akong sinasabi sa kanila. Sanay na rin naman silang makarinig ng ganyan eh. Minsan nga mas higit pa riyan ang naririnig nila. Hindi na rin affected ang mga bata. Ako naman from the start marami na rin akong naririnig na ganyan. Marami na rin ang nag-warning sa akin even before, kaya lang medyo matigas din ang ulo ko noon. Kaya iyang mga ganyan hindi na ako affected talaga,” sabi pa ni Sunshine.
( Ed de Leon )
