Shabu queen tiklo sa Kalye Demonyo (Paslit pa tulak na)

HINDI nakapalag nang pagsalikopan hanggang maaresto ng mga tauhan ng Philippine Drug Enforcement Agency (PDEA) ang tinaguriang “shabu queen” ng Bulacan sa isinagawang entrapment operation kamakalawa.

Sa ulat mula sa tanggapan ni PDEA Director General Arturo G. Cacdac Jr., kinilala ang suspek na si Sharry J. Bartolome, residente ng Brgy. Minuyan Proper, San Jose Del Monte City, Bulacan.

Ayon sa imbestigasyon, dakong 7 p.m. nang masakote si Bartolome makaraang bentahan ng 53 gramo ng shabu na may street value na P243,000, ang isang PDEA agent sa Kalye Demonyo, Road 2, sa naturang barangay.

Nabatid sa ulat ng mga awtoriad na paslit pa lamang si Bartolome ay ginagamit na siya ng sindikato bilang drug courier hanggang siya ay maging isang big time shabu dealer.

Kasalukuyang nakapiit si Bartolome sa detention cell ng PDEA Regional Office 3 sa Camp Olivas, San Fernando City, Pampanga habang inihahanda ang kasong isasampa laban sa kanya.