7 sugatan sa karambola ng 6 sasakyan

PITO ang sugatan sa karambola ng anim na sasakyan sa northbound lane ng EDSA Guadalupe, nitong Martes ng umaga.

Sangkot sa karambola ang dalawang bus, isang taxi, at tatlong jeep.

Sa paunang imbestigasyon, nawalan ng preno ang isang bus ng Roval Transport na biyaheng Muntinlupa-Valenzuela.

Dahil dito, sumalpok ito sa jeep na nasa unahan.

Bumangga ang jeep sa isa pang jeep, na bumangga sa taxi.

Sumalpok din ang taxi sa isa pang bus.

Sugatan sa karambola ang dalawang babae at limang lalaki, kabilang na ang mga driver ng PUJ.

Nahirapan ang Metro Manila Development Authority (MMDA) road emergency group na batakin ang bus dahil mahina ang preno at iniiwasan nilang dumausdos ito.

Samantala, kasalukuyang pinaghahanap ng mga awtoridad ang driver at konduktor ng Roval bus na tumakas makaraan ang insidente.