Kim, handa nang tumanggap ng daring role

MAY bagong negosyo na naman si Kim Chiu dahil isa siya sa business partner ng ATC Healthcare ni Albert T. Chua at endorser din ng FatOut Colon Cleasing Food Supplement kaya naman sa ginanap na contract signing at launching nito ay natanong ang aktres kung paano siya napapayag na maging bahagi nito.

“Business partner ako rito with a good cause. Kasi lahat ng proceeds ay mapupunta sa selected foundation ko and sa ATC Foundation. Pumayat ka na, nakatulong ka pa sa ibang tao,” bungad paliwanag ni Kim.

Hindi na bago ang ganitong endorsement ni Kim tungkol sa kalusugan.

Aniya, “’yung una ay parang campaign lang na ‘Win Against Asthma’ at ito namang FatOut, supplement siya at talagang sinubukan ko at effective talaga, talagang se-sexy ka.”

Sexy ba talaga ang tingin ni Kim sa sarili? “Oo naman, sexy ako talaga. Oo naman, ganoon talaga sagot. Ang sexy naman is not about the skin ipinakikiita mo, eh. It’s how you express yourself in a sexy way. Kung iisipin mong sexy ka, lalabas ‘yun.”

At dahil sexy na si Kim ay willing na siyang tumanggap ng daring role o proyektong lalabas ang pagka-sexy niya.

“Depende po sa kung ano ang idudulot kong maganda, kung makai-inspire po tayo sa ibang tao, depende sa tatanggapin nating role.

“Siyempre, TV personality tayo, maraming taong naglu-look up sa atin and siyempre may moral obligation tayo sa mga tao. Kung ‘yung kaseksihan mong ‘yun ay makai-inspire sa mga tao, gagawin ko,” pahayag ng aktres.

Paano kung matuloy ang movie project nila ni Piolo Pascual at kailangan ng sexy scene, okay ba kay Kim?

“Isang sequence lang naman siguro ‘yun, so bakit naman hindi since 10 years ko na (ahowbiz) next year. Tingnan natin,”nakangiting sagot ng aktres.

At sa tanong kung willing siyang mag-pose sa men’s magazine, “ayy, parang hindi keri.”

Sa kabilang banda, muling sinabi ni Kim na safe gamitin ang FatOut dahil isa itong Sweep and Shred Formula na nagpapalinis ng colon at trimming down your fat.  Ang ingredients daw ng FatOut ay Psyllium Husk na nagtatanggal ng toxins sa colon, Green Tea Extract para ma-burn ang fat, Pu’er Tea Extract, Aloe Vera Powder, Alfalfa, at Oat Fiber.

FACT SHEET – Reggee Bonoan