HATAW! D'yaryo ng Bayan hatawtabloid.com
NADAAN kami sa isang mall noong Sabado at nakakita kami ng napakahabang pila. Natuwa kami dahil mukhang may isang pelikulang kumikita, ang haba talaga ng pila eh. Noong tingnan namin kung ano ang pinipilahan, hindi naman pala takilya ng pelikula. Ang pinipilahan pala nila ay iyong bilihan ng tickets para roon sa Tamang Panahon Event ng AlDub.
Nagtanong kami, aba iyong mga prime ticket ay mahigit na P1,000 ang bayad at ang sabi sa amin naghihintay pa raw iyong ticket seller ng advise kasi nga mukhang sold out na sila. Ilang oras pa lang iyon matapos na mai-announce ang event na iyon ng AlDub sa telebisyon.
Hindi mo masasabing hinakot iyon. Wala kang makikitang mga arkiladong bus na sinakyan ng mga taong iyon para bumili ng tickets. Halata mo naman ang crowd kung hakot eh, kasi may mga arkiladong sasakyan iyan. Pero kung ang mga tao, kanya-kanyang punta, iyan ang hindi hakot. Iyan ang tunay na crowd. At naniniwala na kami ngayon, matindi talaga ang fans niyang AlDub. Hindi na libre iyan eh. May bayad iyan. Kung magagawa nilang makapagbayad ng libo para lamang mapanood ang isang TV show ng live, na kung iisipin mapapanood din naman nila sa TV ng kasabay lang, aba isipin ninyo kung ano ang magagawa nila kung isang pelikula iyan.
Kaya nga raw may mga pelikulang umuurong na sa Metro Manila Film Festival eh, dahil alam nilang mangangamote lang sila sa takilya dahil kasama iyong AlDub sa isang pelikula.
Masasabi rin nating tinalo ng popularidad ng AlDub pati ang piracy. Kasi sinasabi rin nila na iyong CD ni Alden Richards, naging gold noon mismong araw na inilabas iyon. Nangyari iyon dahil may mga advanced sales sila. May mga bumili na nang diretso bago pa man nailabas iyon sa mga tindahan.
Sa nakita naming iyan, tiyak na sa Metro Manila, na obligadong hatiin ang bilang ng mga sinehan sa lahat ng pelikulang kasali sa festival, darami lamang ang sinehan niyang AlDub pagkatapos ng dalawang araw. Pero palagay namin sa mga probinsiya, baka puro AlDub na ang palabas sa mga sinehan. Lalabas talagang kawawa na ang ibang mga pelikula.
HATAWAN – Ed de Leon
