2 estudyante nag-away sa classroom 1 patay

PATAY ang isang binatilyong estudyante nang mabagok ang ulo sa baldosa sa loob ng classroom habang nakikipag-away sa kanyang kaklase sa isang paaralan sa Sta. Maria, Bulacan kamakalawa.

Kinilala ang biktimang si Rioben Santor Jr., 14-anyos, estudyante ng Sta. Maria National High School sa naturang bayan.

Ayon kay Larry Lagman, school principal, nagpambuno sina Rioben at ang hindi pinangalanang kaklase na nagresulta sa pagkabagok ng ulo ng biktima.

“In a matter of minutes lang po, nadala namin sa ospital ang bata. Emergency case po, ginawa naman, po, sa ospital ‘yung magagawa nila para ma-revive ‘yung bata,” dagdag ni Lagman.

Sa isinagawang pagsisiyasat ng Education Department investigation, ang pag-aaway ng dalawang estudyante ay naganap habang lunch break kaya walang guro sa loob ng classroom. 

“Wala naman pong teacher in charge kung free time,” ayon kay DepEd-Bulacan Assistant Schools Division Superintendent Bernadette Tamayo.

Gayonpaman, hindi sang-ayon ang ama ng biktima na si Rioben Sr., sa paliwanag dahil kapabayaan aniya ito ng mga opisyal ng eskuwelahan. “E, sa loob po ng eskwelahan nangyari. ‘Di po ba dapat sila ang nandodoon?”

Sa panig ng ina ng batang nakaaway ni Rioben, umaasa siya na mapapatawad ang kanyang anak. “Sana po mapatawad nila, kasi po, kami po, hindi po rin namin ginusto ang nangyari. Kaya po, humihingi po kami ng pasensiya, pang-unawa po, dahil aksidente po ‘yung nangyari.”