Pulis patay sa Bagets Gang sa Davao

DAVAO CITY – Pinaghahanap na ang grupo ng mga kabataang miyembro ng gang na itinuturong suspek sa pagpaslang sa isang pulis sa Davao kamakalawa.

Kinilala ang napatay na pulis na si SPO1 Vivencio Virtudazo, nakatalaga sa Toril Police Station.

Base sa imbestigasyon ng Toril PNP, kamakalawa ng gabi, nagsagawa ng mobile patrol si SPO1 Virtudazo sa kanto ng Lao at Agton St. sa Toril nang bigla siyang nilapitan ng grupo ng mga kabataan at siya ay pinagsasaksak.

Ang biktimang tinamaan ng saksak sa leeg at kili-kili ay agad dinala sa ospital ngunit dahil sa malubhang kalagayan ay nalagutan ng hininga.

Ayon kay Davao City Police Office Director, Senior Supt. Vicente Danao Jr., miyembro ng gang ang mga suspek at ‘children in-conflict with the law.’

Nangako ang DCPO director sa pamilya ni SPO1 Virtudazo na bibigyan ng hustisya ang pagkamatay ng nasabing pulis.