Fetus nilapang ng aso sa Cebu (Natagpuan ulo at braso na lang)

CEBU CITY – Iniimbestigahan ng mga pulis kung sino ang mga magulang ng isang fetus na natagpuan  sa  sakahan ng Sitio Upper Tak-an, Brgy. Budlaan, Lungsod ng Cebu kamakalawa.

Nabatid na tanging ulo at isang braso na lang ng fetus ang natagpuan ng grupo nina SPO2 Roy Jayme.

Sinasabing natagpuan ang fetus ng isang Medie Tejero, 40, nakatira sa nasabing lugar, habang hinahanap ang kanyang dalawang anak sa sakahan.

Nakita niyang may kinakagat ang aso na ulo at isang braso ng sanggol at wala nang katawan sa gilid ng puno ng saging.

Agad siyang tumawag sa kanilang barangay upang humingi ng assistance mula sa mga pulis.

Hirap ang mga awtoridad na matukoy kung ilang buwan gulang na ang sanggol dahil tanging braso at ulo na lang ang natagpuan.

Agad dinala ang nasabing fetus sa Cebu Rolling Hills Funeral Homes upang maayos na mailibing.