Luis, hindi pa papasukin ang politika sa 2016 (Dahil abala pa sa kabi-kabilang show…)

KUNG ibabase namin sa sinabi ng TV executive ng ABS-CBN, hindi kakandidato si Luis Manzano sa 2016.

Naitanong kasi namin sa nasabing executive kung bakit si Billy Crawford ang kinuhang host ng bagong game show na Celebrity Playlist gayong kasalukuyang umeere pa ang ikalawang season ng Your Face Sounds Familiar at may It’s Showtime pa na napapanood araw-araw simula Lunes hanggang Sabado.

Bakit hindi si Luis na magaling ding host sa game shows?

“Umeere pa ang ‘Kapamilya Deal or No Deal’, so technically, busy si Luis tapos may ‘ASAP20’ din siya, so wala ring bakante na si Luis.

“At saka may new show siya, hindi lang puwedeng sabihin pa,” sabi sa amin.

Sa madaling salita, kung may bagong programa si Luis at ang Deal or No Deal ay balitang hanggang Disyembre pa ang airing, eh, ‘di hindi makakapaghanda ang TV host/actor ng kanyang kandidatura?

Di ba Ateng Maricris, hanggang Oktubre lang ang deadline ng announcement kung kakandidato o hindi? Eh, paano mangyayari ‘yun, hanggang December pa ang Deal or No Deal? Tapos may paparating pang bagong show?

So, maliwanag na Ateng Maricris, hindi pa papasukin ni Luis ang politika sa 2016.

FACT SHEET – Reggee Bonoan