Mangingisda sugatan sa sakmal ng pating

GENERAL SANTOS CITY – Bagsak sa ospital ang isang mangingisda makaraang sakmalin ng pating sa kanyang binti. Kamakalawa.

Kinilala ang biktimang si Roberto Canoy, 25, residente ng Taluya, Glan, Sarangani province.

Ayon kay Canoy, nangingisda siya sa Sarangani Bay nang makaramdam ng init ng panahon kaya’t naisipan tumalon sa dagat para mapawi ang alinsangan sa katawan.

Ngunit nagulat siya nang biglang sakmalin ng pating ang kanyang binti.

Nakapiglas siya ngunit bumalik ang pating kaya mabilis siyang bumalik sa kanyang bangka.

Nagawa niyang itimon ang bangka hanggang makaabot sa pampang.

Nagpasalamat ang biktima dahil hindi napuruhan ang kanyang binti dahil maliit pa ang nasabing pating.