9 bata patay sa dengue sa Bulacan

SIYAM na bata mula sa anim bayan at siyudad sa Bulacan ang iniulat na namatay dahil sa sakit na dengue na lumalaganap ngayon sa lalawigan.

Sa ulat, nabatid na ang mga namatay sa dengue ay naitala sa mga bayan ng San Rafael, Pulilan, Norzagaray, Angat at mga lungsod ng San Jose del Monte, at Malolos.

Ang nasabing tala ay naiulat mula Enero hanggang unang linggo nitong Setyembre, at ang mga biktima ay nasa edad sampu pababa.

Ang dengue outbreak sa Bulacan ay idineklara bunsod nang nakaaalarmang pagtaas ng bilang ng mga dinapuan nito mula nang pumasok ang kasalukuyang taon.

Nabatid mula sa provincial health department ng Bulacan, nakapagtala sila ng 3,000 kaso ng dengue mula Enero hanggang ngayong Setyembre.

Noong nakaraang taon ay nakapagtala rin ang naturang tanggapan ng 1,115 kaso ng dengue sa lalawigan.

Ayon sa medical staff ng Sacred Heart Hospital sa Malolos, ang kanilang pasilidad ay nakatatanggap ng lima hanggang anim na dengue cases araw-araw.

Tinukoy rin ng Department of Health ang Bulacan na may pinakamalaking bilang ng kaso ng dengue sa Central Luzon, sinundan ng Tarlac at Pampanga.