78-anyos lolo utas sa asawang 68-anyos lola (May nililigawang biyuda)

LEGAZPI CITY – Matinding selos ang itinuturong motibo sa pagpatay ng isang lola sa kanyang mister sa Sorsogon.

Ang biktima ay kinilalang si Melchor Rosin, 78-anyos, ng Brgy. Salvacion, bayan ng Magallanes.

Sa ulat, isang tsismis ang nakarating sa misis niyang si Carmin Rosin, 68-anyos, na ang kanyang mister ay may nililigawang biyuda sa kabilang barangay.

Bago ang insidente, nagkaroon muna ng komprotasyon ang mag-asawa, at mariing itinanggi ng biktima ang mga paratang sa kanya ng misis.

Ngunit nagdilim ang paningin ni Carmin, kumuha ng kahoy at pinaghahampas ang nagpapaliwanag pang asawa.

Bunsod nang matinding tama sa ulo, agad binawian ng buhay ang biktima. 

Ang suspek ay nasa kustodiya na ng Magallanes Municipal Police Station.