HATAW! D'yaryo ng Bayan hatawtabloid.com
NAPATAY ang dalawang hinihinalang miyembro ng crime gang habang nakatakas ang isa nilang kasamahan makaraang makipagbarilan sa mga pulis sa San Jose del Monte City kahapon.
Sa ulat ni Supt. Charlie Cabradilla, hepe ng SJDM City police, kay Bulacan Police director, Sr.Supt. Ferdinand Divina, ang mga napatay ay kinilalang sina Apolinario Bonifacio alyas Apolo; at Victorio Hosmillo, kapwa residente ng Brgy. San Pedro sa naturang lungsod.
Ayon kay Divina, isang alyas Omar ang nakatakas habang nagaganap ang shootout ng mga suspek at mga pulis dakong 1:30 a.m. kahapon.
Nabatid mula kay Cabradilla, nagsasagawa sila ng drug surveillance operation at magsisilbi sana ng warrant of arrest para sa kasong robbery kay Bonifacio nang bigla silang paulanan ng bala ng mga suspek.
Binanggit ng opisyal na si Bonifacio ay no. 5 priority target ng Bulacan Police Provincial Office, at no.1 priority target para sa ilegal na droga ng SJDM City police.
Habag ang kasamahang si Hosmillo ay dating inmate sa National Bilibid Prison (NBP).
Na-recover sa lugar ng insidente ang isang caliber .45 Taurus pistol na may 2 magazine, isang cal. 38 revolver na kargado ng bala, 3 piraso ng basyo ng bala, isang cal. 45, tatlong motorsiklo na walang kaukulang dokumento, mga piyesa ng motorsiklo, limang sachet ng hinihinalang shabu, drug paraphernalia, isang digital weighing scale, at dalawang piraso ng kinatay na cal. 38 revolver.
(MICKA BAUTISTA)
