Misis patay, anak kritikal sa saksak ng erpat

BACOLOD CITY – Patay ang isang misis habang kritikal ang kondisyon ng 9-buwan gulang na sanggol makaraan saksakin ng padre de pamilya dakong 6:45 a.m. kahapon sa kanilang bahay sa Sitio Paradise, Brgy. Rizal, Lungsod ng Silay, Negros Occidental.

Binawian ng buhay bunsod ng saksak sa kaliwang dibdib at kaliwang kamay ang biktimang kinilalang si Sakura Hanna Jimenea, 20, sinaksak ng kanyang mister na si Ed Agustin Ortilla, 21-anyos.

Agad isinailalim sa operasyon ang sanggol dahil lumuwa ang bituka makaraan saksakin ng ama sa tiyan.

Ayon sa inisyal na imbestigasyon ng Silay City Police Station, nagalit ang mister dahil nagseselos kaya agad sinaksak ang kanyang misis pati ang kanilang walang muwang na sanggol na lalaki.

Sinasabing nasa impluwensiya ng ilegal na droga ang suspek nang mangyari ang insidente.