‘Paghamak’ sa alaala ng SAF 44

ANIM na buwan na ang nakalilipas mula nang imasaker ng pinagsanib na puwersa ng Moro Islamic Liberation Front at Bangsamoro Islamic Freedom Fighters ang 44 Special Action Force commandos sa Mamasapano, Maguindanao noong Enero 25.

Sino ang mag-aakala na aaprubahan ng Ombudsman ang pagsasagawa ng paunang imbestigasyon at administratibong paglilitis laban sa junior officers, at kahit sa ilang nakaligtas sa madugong bakbakan sa Mamasapano?

Ito ba ang paraan natin ng pagkilala sa kagitingan at katapatan sa tungkulin ng mga bayani nating pulis na nagsakripisyo ng sariling buhay para tuparin ang kanilang misyon?    

Noong Biyernes ay nanawagan si Senator Alan Peter Cayetano kay Senator Grace Poe, pinuno ng “committee on public order and dangerous drugs,” na buksan muli ang pagsisiyasat ng Senado sa enkuwentro sa Mamasapano noong Enero.

Tinukoy ni Cayetano na kapag hindi sumunod sa utos ang isang police officer na kunin “ang teroristang si Usman o Marwan, kakasuhan ng insubordination, Ngayon, sumunod ka pero hindi perfect ang operation at maraming namatay pero nahuli ang terorista, kakasuhan ka pa rin.”

Alalahanin na ang pulisya, tulad din ng militar, ay sumusunod sa “chain of command” sa pagtupad sa kanilang tungkulin. Kung hindi, sila naman ang mananagot at maaaring makasuhan.

Dapat ba silang imbestigahan sa pagsunod sa utos na nagmula umano sa Pangulo at noon ay suspendidong PNP chief?  Saan puwedeng lumugar ang mga pulis kung ganito ang gagawin sa kanila?

Samantala, ang MILF ay hindi man lang nagsusuko ng kanilang mga tao para maimbestigahan. Sa halip ay sinusuportahan sila ng gobyerno sa pagsusulong ng Bangsamoro Basic Law na magbibigay sa kanila ng kapangyarihang pamunuan ang malawak na bahagi ng Mindanao. 

Hindi ko makita kung nasaan ang “daang matuwid” na sinasabi ni President Aquino sa takbo ng mga pangyayaring ito. Mas pinahahalagahan pa natin ang mga rebelde kaysa mga pulis?

***

SHORT BURSTS. Para sa mga komento o reaksiyon, mag-email [email protected] o mag-tweet sa @Side_View.