Globe data analyst patay sa 2 holdaper (Ginawang panangga sa parak)

PATAY ang isang 24-anyos data analyst ng Globe Telecommunications, na ginawang panangga ng mga nanloob na akyat-bahay, nang mapalaban sa parak kahapon ng madaling-araw, sa Sampaloc, Maynila.

Binawian ng buhay habang isinusugod sa Mary Chiles Hospital ang biktimang si Jake Ryan Marayag, residente ng 17 Arenas St., Sampaloc, Maynila, sanhi ng tama ng bala sa katawan.

Nabatid na kabilang sa iniimbestigahan ang kamag-anak ng biktima na si PO1 Melvin Benteras, 24, nakatalaga sa District Public Safety Batallion ng San Juan Police, dahil siya ang nakabarilan ng tumakas na mga suspek.

Ayon sa imbestigasyon ni PO3 Marlon San Pedro ng Manila Police District-Homicide Section, naganap ang insidente sa loob ng inuupahang apartment ng biktima at mga kaanak dakong 12 a.m.

Kakuwentohan ng biktima ang mga kamag-anak na sina PO1 Benteras, Eric Kevin Rodriguez, Gilmar Banguilan, at kapatid ng biktima na si Sara  Jean, 21, nang pasukin ang kanilang bahay ng dalawang suspek at pinadapa silang lahat habang nakatutok ang baril.

Nagdeklara ng holdap ang mga suspek at hiningi ang kanilang cellphones at iba pang gamit ngunit nagtago sa ilalim ng dining table si Sara Jane at PO1 Benteras.

Nang makapasok sa kuwarto ang pulis ay kinuha ang kanyang service firearm. Ngunit pinaputukan siya ng mga suspek kaya gumanti siya ng putok.

Sa puntong tatakas na ang mga suspek, binitbit nila ang biktima at ginawang panangga sa nagpapaputok na si PO1 Benteras.

Nang makalabas ng pintuan ang mga suspek ay binitiwan nila ang biktima ngunit pinagbabaril bago iniwan.

Patuloy na inaalam ng mga awtoridad kung kaninong bala ang tumama sa biktima.

Leonard Basilio