Baby Go, ang Mother Lily ng Indie Films!

NGUMINGITI lang si Ms. Baby Go kapag sinasabihang siya ang version ni Mother Lily Monteverde ng Regal Films pagdating sa paggawa ng indie films.

Si Ms. Baby ang big boss ng BG Productions International na marami nang nagawang award winning indie films. Kabilang sa mga pelikula nila ang  Lihis,  Lauriana,  Bigkis,  at  Homeless. Lahat ito ay makabuluhan at may hatid na aral sa viewers.

Incidentally, ang Homeless na tinatampukan nina Ejay Falcon, Martin del Rosario, Snooky Serna, Dimples Romana, at iba pa, mula sa direksiyon ni Neal ‘Buboy’ Tan ay magkakaroon ng special screening sa August 9, 2015, Sunday, 6 pm sa Robinsons Galeria Cinema-1. Ang pelikula ay ukol sa typhoon survivor na naging biktima ng human trafficking sa Manila. For ticket inquiry, pls contact Katya at 0915-403-5426)

Natapos na rin ng BG Productions ang Child Haus na ukol sa mga kabataang may cancer. Patapos na rin ang Tupang Ligaw, isang action-drama na mula sa pamamahala ng komiks novelist na si Rod Santiago. Tinatampukan ito ni Matteo Guidicelli, Ara Mina, Paolo Contis, Rico Barrera, at iba pa.

Tinatapos na rin ng BG Productions ang Iadya Mo Kami at Sekyu na kapwa pinagbibidahan ni Allen Dizon. Kasama ni Allen sa Iadya Mo Kami sina Eddie Garcia, Aiko Melendez, Ricky Davao, at Diana Zubiri. Sa Sekyu naman ay kabituin ng morenong aktor sina Sunshine Dizon, Melai Cantiveros, Kiko Matos, at iba pa. Tinatapos na rin ni Direk Louie Ignacio ang Mga Isda Sa Tuyong Lupa at naka-line-up na rin sa project ng BG Productions ang Tres Marias, na ukol naman sa nga batang nabuntis sa murang edad dahil sa kahirapan.

Bukod sa pagmamahal sa pelikula, si Ms. Baby ay isang successful na real estate broker. Ayon sa kanya, gusto niyang makatulong sa movie industry at masaya siya sa ginagawang ito.

“Happy ako kapag nakakagawa ng makabuluhang movies. Challenge sa akin ito, bukod pa roon, nakapagbibigay tayo ng work sa mga taga-industriya e.

“Nakita ko rin na humihina ang movie industry, kaya gusto kong makatulong na buhayin ito. Gusto kong i-try palakihin ulit at ibalik sa dati itong showbiz industry,” saad pa niya.

ALAM MO NA! – Nonie V. Nicasio