Janitor patay sa bugbog ng US army sa Tacloban

TACLOBAN CITY – Patay ang isang janitor ng San Jose Elementary School sa Tacloban City makaraan bugbugin ng isang US Army na nagbabakasyon lang sa siyudad.

Kinilala ang suspek na si Lee Guyon, 26, nakadestino sa 25th ID 2nd Brigade 121 Infantry Charlie Coy, residente ng Wahiana, Hawaii at may kasama siyang isang nagngangalang Rolando Duran, isang seaman.

Ang biktima ay kinilalang si Edwin Matiza, 30-anyos.

Ayon kay S/Insp. Edgar Octaviano, hepe ng Abucay PNP, kustomer sa isang restobar ang suspek at ang biktima.

Dahil sa kalasingan, nasukahan ni Matiza si Guyon kaya nagalit ang suspek. Binugbog ng nasabing US army ang biktima na naging dahilan ng pagkamatay.

Ngunit may ibang anggulo na nakikita ang pulisya dahil ayon kay Octaviano, posibleng iniwang buhay ang biktima makaraan bugbugin ngunit nasagasaan ang ulo ng isang truck.

Sa ngayon, hinihintay pa ang magiging resulta ng awtopsiya sa labi ng biktima para makapagsampa na ng kaso laban sa mga suspek.