7 patay, 30 arestado sa Davao City drug raid

DAVAO CITY – Patay ang pitong hinihinalang drug pushers nang manlaban sa operasyon ng mga awtoridad sa lungsod ng Davao dakong 3 a.m. kahapon.

Sabay-sabay na operasyon ang inilunsad sa ilalim ng “Lambat-Sibat: Oplan Kaagapay” ng Davao City Police Office (DCPO), CIDG central office at PDEA sa bahay ng suspected drugs pusher upang isilbi ang search warrant.

Kabuung 35 search warrant ang bitbit ng mga tauhan ng DCPO na inilabas ni Judge Emmanuel Carpio ng RTC Branch 16.

Kinilala ang ilan sa mga napatay na sina Cyril Ramos, residente sa San Isidro, Bankerohan; Arnulfo Senieso, Michael Cadiente na kinilala ng kaniyang pamilya bilang isang Reynaldo Quindao, alyas Dondon Bilaan, isang Jerome Portalez at Marvin Vargas.

Habang umaabot sa 30 katao ang naaresto kabilang ang 20 kalalakihan at 10 kababaihan.

Sa inisyal na impormasyon, umaabot sa milyon-milyong halaga ng ilegal na droga ang nakompiska, 13 armas, dalawang hand greenade, 10 bala, at tatlong motorsiklo na ginagamit ng mga suspek sa kanilang pagtutulak ng illegal drugs.

Matagumpay na naisagawa ang operasyon sa pakikipagtulungan ng San Pedro Police Station, Sta. Ana, Talomo Police Station, Sasa Police Station, Buhangin Police Station, Toril Police Station, Mintal at Calinan Police Stations sa lungsod ng Davao.

Personal na pinangasiwaan ni CIDG chief Director Benjamin Magalong ang nasabing malaking operasyon.