Pamilya nalason sa pekeng asin

KORONADAL CITY – Isang pamilya sa Brgy. Dajay, Surallah, South Cotabato ang nalason ng hinihinalang pekeng asin na nabili nila sa katabing tindahan.

Ayon kay Brgy. Dajay Chairman at Surallah ABC President Henry Eslabon, pitong miyembro ng pamilya Ricablanca ng Prk. Curba, Brgy. Dajay ang nalason.

Kinilala ang mga biktimang sina Vicenta, Sandy, Roland, Lucena, Heidi na isang buntis, Apitong at ang anak niya.

Ayon kay Eslabon, kamakalawa nang pumunta sa Municipal Health Center si Gng. Vicenta at inireklamo ang nabiling asin sa katabing tindahan na may hindi magandang lasa makaraan ihalo sa kanilang niluto.

Aniya, makaraan silang kumain ay nakaramdam na sila nang pananakit ng tiyan at pagsusuka.

Ipadadala ng Municipal Health Office ang specimen ng naturang asin sa Integrated Provincial Health Office (IPHO) upang mapag-aralan kung ito nga ba ang dahilan nang pagkalason nang nasa-bing pamilya.

Inihayag ni Surallah Municipal Health Officer Dr. Neil Crespo, maituturing na isolated ang kaso nang pagkalason dahil sila lamang sa kanilang lugar ang nabiktima ng sinasabing pekeng asin.

Bago ang insidenteng ito, naging isyu rin ang pekeng bigas sa Davao, pekeng bihon at pagkalason ng halos 2,000 mag-aaral dahil sa candies.