Malapitan utas sa P50 (Ayaw magbigay ng pantoma)

PATAY sa saksak ang isang 46-anyos tricycle driver nang tumangging magbigay ng lagay sa isang lasing sa Tondo, Manila kahapon ng umaga.

Hindi na umabot nang buhay sa Gat Andres Bonifacio Memorial Medical Center ang biktimang si Noel Malapitan, 46, may asawa, ng Gate 7, Parola Compound, Tondo, dahil sa dalawang saksak sa dibdib.

Habang mabilis na tumakas ang suspek na si Roland Panican, residente ng 350 Area A, Gate W-5, Parola Compound, Tondo.

Ayon sa imbestigasyon ni SPO1 Donald Panaligan ng Manila Police District-Homicide Section, dakong 7 a.m. nang maganap ang insidente sa Apex Compound sa Pier 2, North Harbor sa Tondo.

Nakikipag-inoman ang suspek sa kanyang barkada, nang magbaba ng pasahero ang biktima mula sa kanyang tricycle.

Agad siyang nilapitan ng suspek at humingi ng P50 para pandagdag sa pambili ng kanilang inomin.

Ngunit hindi nagbigay ang biktima kaya sa galit ng suspek ay inundayan siya ng saksak.

Leonard Basilio, may kasamang ulat nina Angelica Ballesteros, Anne Marielle Eugenio, Rhea Fe Pasumbal At Beatriz Pereña