Hihirit nang sobra-sobrang pondo sa 2016 parusahan (Isinulong ng minorya sa Kamara)

BINALAAN ng minorya sa Kamara ang mga ahensiya ng gobyerno laban sa paghingi ng sobra-sobrang pondo mula sa 2016 national budget.

Sa harap ito ng napipintong pagsusumite ng Malacañang sa Kamara ng mahigit P3 trillion budget para sa susunod na taon.

Sa ngayon, isinusulong ni Bayan Muna rep. Neri Colmenares na maparusahan ang mga opisyal ng mga ahensiyang hihingi ng malaking pondo ngunit hindi naman gagamitin.

Ang problema aniya sa mga ahensiya ng pamahalaan ay iginigiit sa Kongreso ang mabigyan sila nang sobra-sobrang alokasyon ngunit natutulog lamang ang pondo at kalaunan ay nagkakaroon pa ng under spending.

Kailangang maghigpit aniya rito ang Kamara lalo na at eleksiyon na sa susunod na taon.

Naniniwala ang minority congressmen na kapag maraming ahensiya ang nabigyan ng sobrang pondo ay magkakaroon ng malaking savings ang gobyerno na pwedeng tratuhin na parang pork barrel at libreng magagamit para sa eleksiyon.